ទស្សនិកជនជាច្រើនមិនតិចនាក់នោះទេ ប្រាកដណាស់ពិតជាបានស្គាល់ច្បាស់ហើយ ឧកញ៉ា ខេមរៈ សិរីមន្ត នោះ ដែលជាតារាចម្រៀងលំដាប់ជួរមុខមួយរូបប្រចាំផលិតកម្មរស្មីហង្សមាស តាមរយៈបទចម្រៀងញាក់កន្ទ្រាក់អារម្មណ៍ និងបទចម្រៀងបែបមនោសញ្ចេតនា ។
ជាមួយសមត្ថភាព ទេពកោសល្យ និងទឹកដមសំឡេងដ៏ពីរោះក្រអួនក្រអៅរបស់លោកឧកញ៉ា បានធ្វើឲ្យលោកកាន់តែក្តាប់បានសំឡេងអ្នកគាំទ្រកាន់តែខ្លាំងឡើង ជាពិសេសរាល់បទចម្រៀងរបស់លោកនៅតែមានដក់ជាប់ក្នុងក្រអៅបេះដូងមិត្តស្ដាប់ជានិច្ច ។
ហើយសព្វថ្ងៃនេះ ឧកញ៉ា ខេមរៈ សិរីមន្ត កំពុងសាងក្តីសុខជាភរិយារបស់លោក និងកូនប្រុសកូនស្រី ទោះបីជាមមាញឹកការងារខ្លាំងយ៉ាងណាក៏ដោយ ក៏លោកមិនដែលភ្លេចឡើយ នាំក្រុមគ្រួសារដ៏តូចរបស់លោក ទៅលំហែកាយតាមទីកន្លែងជិតឆ្ងាយ មើលទៅមានសុភមង្គលណាស់ ។
ទោះបីជា តារាចម្រៀងប្រុសរូបនេះ មានងារជាឧកញ៉ា ក៏ពិតមែន ដោយបច្ចុប្បន្ននេះ រូបលោកនៅតែបន្តអាជីពជាតារាចម្រៀង ដោយមិនខ្វាយខ្វល់ពីក្រសែភ្នែកគេឯងនោះឡើយ ដោយកន្លងមកលោកក៏ធ្លាប់បង្ហើបថា ខ្លួនគ្មានថ្ងៃបោះចោលការងារសិល្បៈនោះឡើយ ព្រោះតែការងារនេះហើយទើបធ្វើឲ្យរូបលោកក្លាយជាតារាល្បីមានអ្វីគ្រប់យ៉ាងមកដល់សព្វថ្ងៃនេះ ។
មិនត្រឹមតែប៉ុណ្ណោះ ឧកញ៉ា ខេមរៈ សិរីមន្ត ក៏ត្រូវបានមហាជនដឹងទៀតថា រូបលោកចូលចិត្តធ្វើបុណ្យទា គោរពព្រះសង្ឃជាខ្លាំង ដោយកន្លងមកសូម្បីតែព្រះសង្ឃក៏មានសង្ឃដីកាថា រូបលោកជាតារាប្រុសដែលប្រើប្រាស់សង្ឃសព្ទបានត្រឹមត្រូវ និងល្អជាងគេផងដែរ ។
ជាក់ស្តែង កាលពីថ្ងៃទី១២ ខែវិច្ឆិកា ឆ្នាំ ២០២២ នាម្សិលមិញនេះ គេបានឃើញ ព្រះសង្ឃមួយអង្គ បានបង្ហោះរូបភាពប៉ុន្មានសន្លឹករបស់ ឧកញ៉ា ខេមរៈ សិរីមន្ត ថែមទាំងមានសរសើរពីសីលធម៌របស់ឧកញ៉ានោះ ដោយសម្គាល់ឃើញ ពេលជួបព្រះសង្ឃ ឧកញ៉ា សិរីមន្ត តែងដោះស្បែកជើងចេញ ដើម្បីបង្ហាញពីការគោរព គួរឲ្យយកគម្រូតាមជាខ្លាំង ។
ក្នុងនោះ គណនីហ្វេសប៊ុករបស់ ព្រះសង្ឃ មានសង្ឃដីកាលើកឡើងយ៉ាងដូច្នេះថា៖ “គាត់ពិតជាតារាគំរូល្អណាស់ ពេលថតជាមួយព្រះសង្ឃដោះស្បែកជើង ជូនពរបងកាន់តែជោគជ័យKhemarak Sereymun” ៕
ប្រិយមិត្តចង់ដឹងកាន់តែច្បាស់នោះសូមទស្សនារូបភាពខាងក្រោមនេះ ។
