ដូចមហាជនបានជ្រាបរួចមកហើយដែរ ក្រោយពីការបែកធ្លាយបទចម្រៀងមួយ Folder របស់ វណ្ណដា កាលពីពេលថ្មីៗកន្លងមក អ្នកគាំទ្រតារាចម្រៀងរ៉េបរូបនេះ ហាក់មានការព្រួយបារម្ភពីសុខទុក្ខរបស់លោកយ៉ាងខ្លាំងផងដែរ។ យ៉ាងណា បើគិតមកដល់ពេលនេះរយៈពេលប្រមាណជាង ១ សប្តាហ៍ទៅហើយ នៃការប្រកាសបែកធ្លាយចម្រៀង និង បោះចោលស្នាដៃដែលខ្លួនបានប្រឹងប្រែងធ្វើយ៉ាងសោកស្តាយនោះ។
ដោយឡែក កាលពីយប់ថ្ងៃទី ២១ ខែវិច្ឆិកា ឆ្នាំ ២០២២ កន្លងទៅ តារាចម្រៀងរ៉េបប្រចាំផលិតកម្មបារមី លោក វណ្ណដា ក៏បានបង្ហោះរូបជាច្រើនសន្លឹកធ្វើឱ្យអ្នកគាំទ្រជាច្រើនហាក់រំភើបចិត្ត និង ស្រាលអារម្មណ៍ឡើងវិញពីការព្រួយបារម្ភ Idol របស់ពួកគេ។ ជាមួយនឹងរូបនោះ លោក វណ្ណដា ក៏បានភ្ជាប់ជាមួយចំណងជើងខ្លីដែរថា ៖ «រឿងសំខាន់មួយដែលខ្ញុំតែងតែភ្លេច គឺផ្តល់ពេលវេលាឱ្យខ្លួនឯង»។
ក្នុងនោះដែរ ក៏មានអ្នកគាំទ្របានចូលទៅបញ្ចេញមតិយោបល់ជាច្រើន ក្រោមរូបភាព និង សាររបស់លោក វណ្ណដា ក្រោយបង្ហាញវត្តមានជាថ្មីលើកផេកហ្វេសប៊ុកផ្លូវការ។ ជាមួយគ្នានោះរូបភាពជាច្រើនរបស់លោកបានបង្ហាញជាមួយស្នាមញញឹមយ៉ាងស្រស់ស្រាយនោះ ទទួលបានចែករំលែកដល់ទៅជិត ១៥ ម៉ឺននាក់៕
អត្ថបទ៖ ប្រជាប្រិយ
