ពិតណាស់ កាលពីល្ងាចថ្ងៃទី ៣០ ខែវិចិ្ឆកា ឆ្នាំ ២០២២ កម្មវិធីកីឡាជាតិលើកទី ៣ បានបិទបញ្ចប់ជាស្ថាពរ ដោយមានការចូលរួមពីសំណាក់ថ្នាក់ដឹកនាំប្រទេសគ្រប់ជាន់ថ្នាក់ និង មហាជនរាប់មុឺននាក់ នៅឯពហុកីឡដ្ឋានជាតិមរតកតេជោ រាជធានីភ្នំពេញ។
យ៉ាងណាមិញ នាល្ងាចនោះ ក៏មានការចូលរួមសម្ដែង និង បង្ហាញពីទស្សនីយភាពសិល្បៈសឹងគ្រប់ទម្រង់ ពីសិល្បករប្រចាំប្រទេសកម្ពុជា ជាច្រើនរូបផងដែរ។ បន្ទាប់ពីការសម្ដែងទស្សនីយភាពចប់សព្វគ្រប់អស់ហើយ វីដេអូជាច្រើនត្រូវបានចែកចាយពេសពាញបណ្ដាញសង្គមទាំងហ្វេសប៊ុក និង TikTok រាល់សកម្មភាពកំឡុងពេលសម្ដែង និង ឈុតឆាកក្រៅឆាក ជាដើម។
អ្វីដែលគួរឱ្យចាប់អារម្មណ៍ទៅទៀតនោះ គេសង្កេតឃើញមានវីដេអូក្រោយឆាកមួយ ដែលកំពូលតារាចម្រៀងស្រី ឱក សុគន្ធកញ្ញា និង សិល្បករផ្សេងទៀតបានឈរគាំទ្រលោក វណ្ណដា កំពុងសម្ដែងទស្សនីយភាពបទ «Time To Rise» យ៉ាងរំភើបរីករាយ និង មោទកភាពជាទីបំផុត។
ដោយឡែក វីដេអូផ្សេងទៀត ក៏បានឃើញអ្នកនាង ឱក សុគន្ធកញ្ញា បានចូលទៅស្វាគមន៍ក្នុងបន្ទប់រង់ចាំរបស់ក្រុមការងារផលិតកម្ម បារមី យ៉ាងរាក់ទាក់ និង ស្រស់ស្រាយខ្លាំងបំផុត។ ដោយក្នុងនោះមានវត្តមានលោកតា គង់ ណៃ និង ភរិយារបស់លោក ព្រមទាំងលោក វណ្ណដា និង ថ្នាក់គ្រប់គ្រងផលិតកម្ម រួមទាំងក្រុមការងារជាច្រើននាក់របស់បារមីផងដែរ។
លើសពីនេះទៅទៀត ក្នុងវីដេអូទាំងនោះមហាជនអ្នកគាំទ្របានឃើញតារាស្រីរូបនេះបានទៅឱបសិស្សប្អូនរបស់ខ្លួន គឺលោក ម៉ាន់ វណ្ណដា យ៉ាងកក់ក្ដៅជាទីបំផុត ដែលធ្វើឱ្យអ្នកគាំទ្រញញឹមបិទមាត់មិនជិត ក្រោយបានឃើញវីដេអូមួយនេះហើយម្នាក់ៗក៏សង្ឃឹមថានឹងមានការសហការរួមគ្នារវាងកំពូលតារាទាំង ២ ឆាប់ៗនាពេលខាងមុខនេះ៕
សូមទស្សនាវីដេអូខាងក្រោម៖
ប្រភព៖ ប្រជាប្រិយ
