នៅរាត្រីថ្ងៃទី ៣០ ខែវិច្ឆិកា ឆ្នាំ ២០២២ ពិធីបិទកីឡាជាតិ លើកទី ៣ និង កីឡាជាតិជនពិការ លើកទី ១ ឆ្នាំ ២០២២ បានអង្រួនពហុកីឡដ្ឋានជាតិមរតកតេជោឱ្យពោរពេញដោយសំឡេងហ៊ោកញ្ជ្រៀវអបអរសាទរជាមួយនឹងវត្តមានកំពូលតារាចម្រៀងល្បីៗលំដាប់ប្រទេសរួមមាន អ្នកនាង ឱក សុគន្ធកញ្ញា, តារាចម្រៀងរ៉េប វណ្ណដា និង លោក ជី ដេវីត ជាដើម បានបង្កើតផ្ទាំងទស្សនីយភាពដ៏ជក់ចិត្តដិតអារម្មណ៍សម្រាប់ថ្នាក់ដឹកនាំកំពូលៗ និង ទស្សនិកជន។
ក្រៅពីរំភើបញាប់ញ័របេះដូងជាមួយនឹងការសម្ដែងដ៏កក្រើកពីកំពូលតារាល្បីៗហើយនោះ មហាជនអ្នកគាំទ្រក៏ហាក់ផ្ទុះការចាប់អារម្មណ៍ជាខ្លាំងក្រោយឃើញសកម្មភាព ជី ដេវីត ឈរក្រោមឆាកមើលការច្រៀង និង សម្ដែងរបស់តារាចម្រៀងរ៉េប វណ្ណដា ដោយបង្ហាញពីទឹកមុខញញឹមញញែមទៀតផង។
អាចនិយាយបានថា នេះគឺជាទង្វើមួយដ៏នឹកស្មានមិនដល់សម្រាប់មហាជនអ្នកគាំទ្រ ព្រោះដូចប្រិយមិត្តភាគច្រើនបានជ្រាបហើយថា ថ្មីៗនេះ តារាចម្រៀងរ៉េបទាំងពីររូបខាងលើមានរឿងរកាំរកូសក្នុងសិល្បៈរហូតអ្នកទាំងពីរចេញបទចម្រៀងរ៉េបឌឺដងឆ្លងឆ្លើយគ្នាទៅវិញទៅមក ផ្អើលអស់អ្នកគាំទ្រទៀតផង។
ដោយឡែកខណៈរឿងរ៉ាវទាស់ចិត្តគ្នានោះ នៅតែជាប្រធានបទក្ដៅមិនទាន់រសាយពីបណ្ដាញសង្គមនៅឡើយ ស្រាប់តែ ជី ដេវីត បង្ហាញសកម្មភាពឈរមើល វណ្ណដា ច្រៀងទាំងទឹកមុខញញឹម ធ្វើឱ្យអ្នកគាំទ្រផ្ទុះការភ្ញាក់ផ្អើលជាខ្លាំង៕
សូមទស្សនាវីដេអូខាងក្រោម៖
ប្រភព៖ ប្រជាប្រិយ
