ថៃ៖ កាលពីថ្ងៃទី ២៨ ខែវិច្ឆិកា ឆ្នាំ ២០២២ កន្លងទៅនេះ មានហេតុការណ៍មួយធ្វើឱ្យភ្ញាក់ផ្អើល និង ហួសចិត្តខ្លាំង ក្រោយមានព្រះសង្ឃច្រើនអង្គគង់នៅវត្តមួយកន្លែង ក្នុងប្រទេសថៃ ត្រូវគេចាប់ផ្សឹកអស់ពីវត្ត ក្រោយពិនិត្យឃើញមានសារធាតុញៀនក្នុងទឹកនោម។
តាមព័ត៌មានបានឱ្យដឹងថា វត្តមួយកន្លែងនោះ ស្ថិតនៅក្នុងខេត្តផេចៈបុរី ប្រទេសថៃ មានព្រះសង្ឃគង់នៅចំនួន ៤ អង្គ។ យ៉ាងណាមិញ ព្រះសង្ឃទាំង ៤ អង្គ ក្នុងនេះមានទាំងចៅអធិការផង ត្រូវបានអជ្ញាធរតម្រូវឱ្យមកធ្វើតេស្តពិនិត្យទឹកនោម ស្រាប់តែប្រទះឃើញទឹកនោមមានពណ៌ស្វាយ ដែលមានន័យថា មានសារធាតុញៀនទាំង ៤ អង្គ។
ក្រោយពីបានពិនិត្យរកឃើញសារធាតុញៀនរួចមក ព្រះសង្ឃទាំង ៤ អង្គ ក៏ត្រូវបានគេចាប់ផ្សឹកភ្លាមៗអស់ពីវត្ត។ ដោយឡែកសម្រាប់អ្នកភូមិវិញ ក៏បាននាំគ្នាព្រួយបារម្ភ ព្រោះខ្លាចមិនមាននរណានៅជួយធ្វើពិធីសាសនាក្នុងភូមិ ព្រមទាំងក្នុងវត្តក៏មានទ្រព្យសម្បត្តិ និង សត្វឆ្កែឆ្មាជាច្រើនក្បាល ដែលត្រូវថែរក្សា ត្រូវឱ្យចំណីទៀត។
យ៉ាងណាមិញ ខាងអាជ្ញាធរក៏បានទាក់ទងទៅក្រសួងពាក់ព័ន្ធ ដើម្បីស្នើសុំឱ្យមានព្រះសង្ឃមកចាំវត្តនៅទីនេះផងដែរ ដើម្បីមហាជនអ្នកភូមិបានមកធ្វើបុណ្យ និង មិនឱ្យវត្តក្លាយជាវត្តគេទុកចោល៕
