ចាប់តាំងពីខកស្នេហ៍ជាមួយ នាយចឺម មករហូតមកដល់ពេលនេះ អ្នកមេម៉ាយសាច់សខ្ចី សេង សុខឃីម ហាក់ធ្វើចិត្តបានមួយភាគធំ និង ត្រឡប់ទៅប្រើជីវិតពោរពេញដោយស្នាមញញឹមឡើងវិញ ខណៈកាលទើបបែកបាក់គ្នាថ្មីៗ គេចាំបានថា នាងតែងបង្ហាញអាការឈឺចាប់ ខូចចិត្តនឹងស្នេហាមិនតិចដងនោះទេ។
អំឡុងពេលច្រើនខែដែលជួបស្នេហ៍មិនសមប្រកបនេះ គេឃើញអ្នកនាង សេង សុខឃីម ក៏បានបកស្រាយបទចម្រៀងផ្ទាល់ខ្លួនជាច្រើនបទ ដែលសុទ្ធសឹងជាប្រភេទបទមនោសញ្ចេតនាស្នេហាឈឺចាប់។
រឿងដែលមហាជនភ្ញាក់ផ្អើល ក្រោយចេញបទចម្រៀង និង ទទួលបានការគាំទ្រគួរឱ្យកត់សម្គាល់ទៅលើទឹកដមសំឡេងពីសំណាក់ទស្សនិកជន ស្រាប់តែថ្មីៗនេះ សេង សុខឃីម បានបង្ហើបនៅលើហ្វេសប៊ុកថា នឹងកំពុងត្រៀមចាប់ដៃ ប៊ុត សីហា ចេញបទចម្រៀងឆ្លងឆ្លើយ។
សេង សុខឃីម មិនបានបញ្ជាក់មួយរយភាគរយទេថានឹងច្រៀងបទឆ្លើយឆ្លងនឹងម្ចាស់ពាន The Voice Cambodia រដូវកាលទី ១ លោក ប៊ុត សីហា គ្រាន់តែសួរនាំអ្នកគាំទ្រថា ៖ «ជម្រាបសួរ ពុកម៉ែបងប្អូនទាំងអស់ ចង់ស្តាប់បទថ្មីនាងខ្ញុំច្រៀងឆ្លងឆ្លើយនឹងបង ប៊ុន សីហា អត់?»។ អ្នកបង្ហើបរបស់អ្នកមេម៉ាយរូបនេះ ធ្វើឱ្យមហាជនយល់ថា នាង និង ប៊ុត សីហា នឹងចេញបទរួមគ្នាឆាប់ៗមិនខាន៕
