ចាប់តាំងពីទទួលបានតំណែងជ័យលាភីរងលំដាប់ទី ៥ ក្នុងការប្រកួត Miss Grand International ហើយបានចូលរួមចុះកុងត្រាជាមួយស្ថាប័ន គេសង្កេតឃើញថាតារាស្រី ពេជ្រ វត្តីសារ៉ាវឌ្ឍី ហាក់មមាញឹកជាខ្លាំង ដោយនាងត្រូវបង្ហាញខ្លួនតាមកម្មវិធី និង កិច្ចសម្ភាសន៍ផ្សេងៗ។
ថ្មីៗនេះ ពេជ្រ វត្តីសារ៉ាវឌ្ឍី បានចូលខ្លួនសម្ភាសន៍ក្នុងកម្មវិធីរបស់ម៉ាដាម Pichy ដែលជាអ្នកមានឥទ្ធិពលមួយរូបប្រចាំប្រទេសថៃ។ ក្នុងកិច្ចសម្ភាសន៍នោះ នាងត្រូវបានគេសួរសំណួរជាច្រើន ហើយក៏បានរំលឹកពីអតីតកាលជាក្មេងកំព្រាគ្មានម្ដាយមើលថែផងដែរ។
ក្រោយឮបែបនេះម៉ាដាម Pichy ក៏បាននិយាយទៅកាន់ ពេជ្រ វត្តីសារ៉ាវឌ្ឍីថា៖ «ខ្ញុំសុំធ្វើជាម្ដាយរបស់អ្នកបានទេ?»។ គ្រាន់តែឮប្រយោគនេះភ្លាម ពេជ្រ វត្តីសារ៉ាវឌ្ឍី ហាក់រំភើបចិត្តខ្លាំងរហូតទប់ទឹកភ្នែកមិនជាប់ ដោយនេះជាលើកដំបូងដែលនាងទទួលបានអារម្មណ៍បែបនេះ ហើយមិនត្រឹមតែប៉ុណ្ណឹង ម៉ាដាម Pichy ក៏បានឱ្យកាដូជាកាបូបយីហោ Chanel ដែលមានតម្លៃប្រមាណជាង ៥ ម៉ឺនបាតដល់នាងផងដែរ៕ ប្រជាប្រិយ
