ថ្មីៗនេះ អ្នកគាំទ្រគូស្នេហ៍តារាចម្រៀងប្រុសរូបសង្ហា ថុល សុភិទិ កំពុងផ្ទុះការព្រួយបារម្ភជាខ្លាំង បន្ទាប់ពីមានការចែកចាយរូបភាពអ្នកនាង ឡុង ម៉ានីន ដែលជាមិត្តស្រីតារាប្រុសខាងលើ កំពុងគេងសន្លប់នៅមន្ទីរពេទ្យ ហើយបើតាមការឱ្យដឹងពីគ្រួសារ ម៉ានីន បានលេបថ្នាំសម្លាប់ខ្លួន ព្រោះនាងមានបញ្ហាផ្ទាល់ខ្លួនក្នុងគ្រួសារ គិតច្រើន ស្រ្តេសខ្លាំងរហូតធ្វើអត្តឃាត។
ងាកមកតារាចម្រៀង ថុល សុភិទិ វិញ ក្រោយឃើញស្ថានភាពសុខភាពរបស់សង្សារបណ្ដូលចិត្តនៅទន់ខ្សោយមិនទាន់ប្រសើរឡើងបែបនេះ លោកហាក់បង្ហាញក្ដីព្រួយបារម្ភកាន់តែខ្លាំងតាមរយៈការបង្ហោះពាក្យជូនពរនានានៅលើគណនីហ្វេសប៊ុក។ លើសពីនេះ ភិទិ ថែមទាំងបានទៅដល់មន្ទីរពេទ្យដេកយាមគូស្នេហ៍ ដើម្បីផ្ដល់កម្លាំងចិត្តដល់នាងថែមទាំងផង។
អ្នកនាង ឡុង ម៉ានីន បានថតរូបមិត្តប្រុសសំណព្វចិត្តដែលកំពុងគេងកំដរនាងនៅឯមន្ទីរពេទ្យ ហើយអរគុណចំពោះទឹកចិត្តមិត្តប្រុសថា ៖ «អរគុណដែលតែងតែនៅក្បែរអូនពេលអូនលំបាក ទោះពេលខ្លះបងនៅឆ្ងាយក៏បងតែងតែផ្តល់កម្លាំងចិត្តឱ្យជានិច្ច Doreamon»៕ អត្ថបទ៖ ប្រជាប្រិយ
