បើនិយាយពីកូនប្រុសស្រីរបស់តារាចម្រៀងប្រុស ខាត់ ជេមស៍ មហាជនជ្រាបហើយថា កន្លងមកកូនៗទាំង ៤ រូបរបស់លោក តែងទទួលបានការចាប់អារម្មណ៍ និង សរសើរជាមួយរូបរាងស្អាតៗគួរឱ្យស្រឡាញ់ ភាពវៃឆ្លាត និង សមត្ថភាពផ្សេងៗរបស់ពួកគេ ដែលសុទ្ធសឹងតែមានដុងសិល្បៈបេះដាក់មិនចាញ់ឪពុកនោះឡើយ។ លើសពីនេះ កូនៗរបស់លោក ខាត់ ជេមស៍ ក៏ធ្លាប់បង្ហាញសមត្ថភាពក្នុងសិល្បៈឡើងកម្មវិធីផ្សេងៗជាមួយឪពុក និង មានអ្នកខ្លះចេញបទចម្រៀងផ្ទាល់ខ្លួនទៀតផង។
ម្យ៉ាងវិញទៀត កាលពីកន្លងទៅ តារាចម្រៀង ខាត់ ជេមស៍ ក៏បានប្រកាសឱ្យដឹងថា កូនៗទាំង ៤ របស់លោកនឹងរួមដំណើរលើវិស័យសិល្បៈជាមួយលោកយ៉ាងពេញទំហឹងក្នុងផលិតកម្មផ្ទាល់ខ្លួនរបស់លោក និង កំពុងត្រៀមចេញបទចម្រៀងថ្មីៗសម្រាប់ពួកគេផងដែរ។
ដោយឡែក ថ្មីៗនេះ មហាជនអ្នកគាំទ្រលើបណ្ដាញសង្គមកំពុងចាប់អារម្មណ៍ខ្លាំងចំពោះកូនស្រីច្បងរបស់លោក ខាត់ ជេមស៍ ឈ្មោះថា អេមមី ខណៈបានឃើញនាងបង្ហាញវត្តមានលើឆាកប្រគំតន្រ្តីជាលើកដំបូងក្នុងកម្មវិធី Miss Teen Cambodia ដោយបានលើកយកបទចម្រៀងផ្ទាល់ខ្លួនដែលទើបចេញមានចំណងជើងថា «កុំចង់ត្រូវគ្នា» ច្រៀង និង សម្ដែងលើឆាក បង្ហាញឱ្យពីសមត្ថភាពមិនធម្មតាឡើយ។
ពេលនេះ វីដេអូនៃសកម្មភាពឡើងឆាកលើកដំបូងរបស់ អេមមី កូនស្រីតារាចម្រៀងជើងចាស់រូបនេះដែរ កំពុងត្រូវបានមហាជនអ្នកគាំទ្រចាប់អារម្មណ៍ និង បង្ហាញការសរសើរចំពោះសមត្ថភាពរបស់នាងផងដែរ៕
សូមទស្សនាវីដេអូខាងក្រោម៖
ប្រភព៖ ប្រជាប្រិយ
