កាលពីអធ្រាត្រថ្ងៃទី ១០ ឈានចូលថ្ងៃទី ១១ ខែធ្នូ ឆ្នាំ២០២២ នេះ កំពូលតារារ៉េបប្រចាំប្រទេសកម្ពុជា លោក វណ្ណដា ព្រមទាំងអ្នកលេងឧបករណ៍តន្រ្តីខ្មែរយ៉ាងចំណាន លោក វណ្ណថាន បានលេចវត្តមានសម្ដែងនៅក្នុងកម្មវិធីប្រគំតន្ត្រីដ៏ធំសម្បើមប្រចាំឆ្នាំក្នុងប្រទេសថៃ «Big Mountain Music Festival 12 Block Stage» នៅឯតំបន់ The Ocean Khao Yai ប្រទេសថៃ។
ពិតណាស់ វត្តមាននៃការសម្ដែងមួយនេះបានធ្វើឱ្យអ្នកគាំទ្រទាំងក្នុងប្រទេសកម្ពុជា និង ថៃបានរង់ចាំយ៉ាងអន្ទះសារ ទីបំផុតក៏បានឃើញការសម្ដែងយ៉ាងអស្ចារ្យមួយនេះ ធ្វើឱ្យលោកអ្នកគាំទ្រដែលបានទៅទស្សនាផ្ទាល់ទទួលបានបទពិសោធន៍ថ្មីមួយផ្សេងទៀតនៃការប្រគំតន្ត្រីមួយនេះតែម្ដង។
ជាមួយនឹងឧបករណ៍តន្រ្តីបុរាណខ្មែរពីលោក វណ្ណថាន ព្រមទាំងការបង្ហើរសំនៀងច្រៀង និង រ៉េបពីលោក វណ្ណដា បានទទួលការគាំទ្រយ៉ាងខ្លាំងពីសំណាក់អ្នកគាំទ្រនៅឯប្រទេសថៃ ដែលនេះគឺជាមោទកភាពមួយរបស់ប្រជាជន ឬ អ្នកគាំទ្ររបស់សិល្បករខ្មែរយ៉ាងពិតប្រាកដ៕ ប្រភព៖ ប្រជាប្រិយ
