ចាប់តាំងតែឈានជើងចូលក្នុង Top ១០ នៃកម្មវិធី Miss Grand International ២០២២ និង ក្លាយជាម្ចាស់មកុដលំដាប់រងទី ៥ មក បវកញ្ញាខ្មែរ ពេជ្រ វត្តីសារ៉ាវឌ្ឍី ហាក់កំពុងតែក្ដាប់បានប្រជាប្រិយភាពខ្លាំងមិនថាក្នុង និង ក្រៅប្រទេសនោះទេ។ លើសពីនោះ បវរកញ្ញាពោរពេញដោយសម្រស់រូបនេះ ក៏កំពុងតែទទួលបានឱកាសការងារច្រើនសន្ធឹកសន្ធាប់ផងដែរពេលបំពេញតួនាទីនៅប្រទេសថៃ។
ជាការពិតណាស់ ចំពោះវត្តមានរបស់កញ្ញា ពេជ្រ វត្តីសារ៉ាវឌ្ឍី នៅលើទឹកដីថៃខណៈពេលបំពេញការងារនាពេលនេះ គឺកំពុងតែទទួលបានការគាំទ្រ និង ឆក់បានបេះដូងប្រជាជនថៃ ក៏ដូចជាម្ចាស់ប្រ៊េនផ្សេងៗនៅក្នុងប្រទេសថៃមិនតិចនោះទេ តាមរយៈកាយវិការទន់ភ្លន់ និង សមត្ថភាពរបស់នាង។
អ្វីដែលរឹតតែគួរឱ្យសរសើរចំពោះបវរកញ្ញាខ្មែរ ពេជ្រ វត្តីសារ៉ាវឌ្ឍី គឺពេលនេះនាងកំពុងតែក្តាប់បានឱកាសជាគ្រូបង្វឹក Miss Grand Lamphun Lampang ២០២៣ ដែលហ្វឹកហាត់ត្រៀមប្រកួតថ្ងៃផ្តាច់ព្រ័ត្រនាងពេលឆាប់ៗខាងមុខនេះ។
ងាកទៅមើល ពេជ្រ វត្តីសារ៉ាវឌ្ឍី វិញ ស្របពេលទទួលបានឱកាសបែបនោះហើយ នាងបានខិតខំបង្ហាត់បង្រៀនកូនសិស្សយ៉ាងយកចិត្តទុកដាក់ ចែករំលែករាល់បទពិសោធន៍ល្អៗដែលមានក្នុងការប្រកួតជូនដល់បេក្ខភាពប្រកួត Lamphun Lampang ដើម្បីធ្វើឱ្យបានល្អនៅលើឆាក។
ទន្ទឹមនឹងនោះ សម្រាប់មហាជនខ្មែរក៏មានមោទកភាពចំពោះនាងខ្លាំងណាស់ ព្រោះជាបវរកញ្ញាខ្មែរទីមួយហើយ ដែលនាំឱ្យប្រទេសកម្ពុជាមានឈ្មោះបោះសំឡេងខ្លាំងក្នុងប្រទេសថៃ៕ ប្រភព៖ ប្រជាប្រិយ
